Es comèrci de Bossòst mòstren fotografies antigues des processions de Setmana Santa

  • Exposicion itineranta prebotjada pera Associacion de Comerçants e Empresaris
  • Es processions an lòc Diuendres Sant e Dimenge de Pasca

Es establiments comerciaus e ostalèrs de Bossòst mòstren enes sues veirines fotografies antigues, e tanben de mès recentes, des processions dera Setmana Santa, es uniques que se consèrven ena Val d’Aran damb mès de cent ans d’istòria. Aguesta exposicion itineranta a estat prebotjada pera Associacion de Comerçants e Empresaris (ACEB) entà promòir eth sector e dar a conéisher as visitaires es servicis comerciaus, ostalèrs e toristics, atau coma era cultura e eth patrimòni pròpri deth municipi pendent aguesti dies de vacances.

D’un aute costat, es actes de Setmana Santa, organizadi pera Associacion de Setmana Santa damb era collaboracion de vesins e der Ajuntament, comencen aguest Dijaus Sant damb es oficis dera vrespada (19.00h), enes quaus un grop d’armats costòdien era procession deth Santíssim laguens dera glèisa. Era procession deth Via Crucis ei Diuendres Sant, 29 de març, entàs 10.00 h, e era deth Sant Enterrament serà eth madeish dia tàs 22.30 h. Aguestes incorpòren eth nau pas deth Crist dera Esperança, introdusit en 2012. Es actes concludissen Dimenge de Pasca, dempús dera missa des 12.30h, damb era procession deth Sant Retrobament.

 

 

Deixa un comentari

L'adreça electrònica no es publicarà Els camps necessaris estan marcats amb *