Bossòst apròve eth sòn pressupòst

Eth Plen der Ajuntament de Bossòst a aprovat de forma iniciau eth pressupòst municipau de 2013, qu’ascendís a 1.522.282,14 èuros. Aguesta chifra supòse un increment d’un 40,8 % respècte de 2012, generat per naua despena subvencionabla, coma eth programa Viure al Poble Més (FEDER+Governacion), artenhut enguan per Ajuntament, e era ajuda deth Plan Unic d’Òbres e Servicis de Catalonha (PUOSC) de 2012. Andues subvencions se destinaràn entara reforma de carrèrs, era promocion e dignificacion deth pòble e era mielhora deth sistèma de sufisença d’aigua. Es compdes an estat aprovadi damb eth vòt a favor deth grop d’Unitat d’Aran (UA) e es vòts en contra de Convergéncia (CDA).

Eth tinent d’alcalde e còsso d’Isenda, Amador Marqués, a explicat que “enguan auem aplicat, un còp mès, critèris de contencion dera despena ordinària, de prudéncia enes ingrèssi e d’impuls ara economia locau per miei de naues inversions subvencionades”. “Es compdes permeten arténher un equilibri entre es principis d’austeritat e estabilitat pressupostària e era prestacion de besonh entàs ciutadans des servicis municipaus, coma es pròpris dera administracion, era brigada d’òbres e manteniment e era zòna esportiva”, segontes Marqués.

Era unica retribucion der equip de govèrn, era deth tinent d’alcalde, s’a vist redusida en un 7 %, pr’amor que consolide entà 2013 era pèrta dera paga extraordinària de Nadau. Aguest sòu ei subvencionat peth Departament de Governacion dera Generalitat en un 60 % per miei des ajudes destinades as retribucions des cargues elèctes.

Deixa un comentari

L'adreça electrònica no es publicarà Els camps necessaris estan marcats amb *