Er Ajuntament de Bossòst apròve ua Declaracion Institucionau a favor d’un espaci comun transtermierèr

Acòrd entre es grops d’Unitat d’Aran e Convergéncia Aranesa

Er Ajuntament de Bossòst a aprovat aué, en un plen extraordinari, ua Declaracion Institucionau a favor d’un espaci comun transtermierèr, dauant es mesures restrictives sus eth confinament perimetrau de Catalonha. Aguestes afècten ara mobilitat entre andús costats dera termièra e, per tant, d’ua forma especiau, ara economia de Baish Aran. Aguesta declaracion ei frut d’un acòrd politic entre es grops d’Unitat d’Aran e Convergéncia Aranesa.

Era Corporacion Municipau prepause ara Generalitat e ar Estat er establiment d’un estatut permanent singular entàs municipis e territòris transtermierèrs “en rason der espaci comun qu’aguesti parçans compartissen damb tota sòrta de relacions de proximitat”, e se’n pogue derivar ua “politica especifica de cooperacion, dinamizacion e relacion permanenta”, en marc dera Union Europèa.

Atau madeish, en tot mostrar-se solidari damb eth besonh de preservar era salut publica, er Ajuntament regrète era manca de responsa dera Generalitat entà atier era assimilacion d’Aran damb eth territòri vesin francés e denoncie eth “grèuge comparatiu” respècte deth reconeishement d’Alt Urgell e Andorra.

En aguest sens, eth plen municipau demane ua “linha especifica d’ajuts dirèctes as negòcis perjudicadi pera pèrta d’activitat en rason dera manca de clients provenents de França”.  

doc20201222

Leave a Reply

Your email address will not be published. Required fields are marked *