Centre Culturau de Bossòst
Acòrd de crompa
Eth Centre Culturau de Bossòst ei ua bastissa des ans 60 deth sègle XX qu’acuelhec un cinèma, era bibliotèca municipau e diuèrses activitats restacades damb era vida locau de Bossòst. D’ençà deth sòn barrament, a principis deth sègle XXI, er Ajuntament a sajat d’aquerir er equipament en diuèrsi moments. Dempús d’ua longa negociacion, ara fin, eth consistòri a artenhut, en 2022, un acòrd damb er Avescat d’Urgelh entà aquerir-le e reconvertir-le en un equipament municipau.
Istòria
Er antic cinèma de Bossòst, o centre culturau, deishèc de foncionar entradi es ans 2000 dempús de 35 ans actiu, apruprètz. Aguesta bastissa, propietat enquia ara der Avescat d’Urgelh, siguec promoiguda peth rector Mn. Facund Salvia enes ans 60, damb era collaboracion dera parròquia, eth Bisbat e diuèrses familhes de Bossòst, qu’aportèren es sòns prèsts atau coma husta deth bòsc. Damb Mn. Jusèp Amiell coma rector, se
retornèren quauques d’aguestes aportacions, a despiech dera limitada economia deth centre. Quan ère rector Mn. Xavier Esplandiu, nomentat en 1977, era direccion deth cinèma parroquiau derivèc ena junta deth nau Centre Culturau entà daurir eth cine a naues programacions e ampliar eth public, en tot entrar en hilat de cinèmes deth Circuït Urgellenc. Pendent aqueth temps, eth centre acuelhuec, ath delà, diuèrsi events, coma hestivaus e era planvoluda net de Reis.
Prepausa
En aguesti moments, er Ajuntament propòse conservar er auditòri der antic cinèma, en tot adaptar-le ara naua normativa d’edificabilitat e seguretat, entà acuélher activitats, coma hestivaus, congrèssi o cicles de cinèma. Era part des aules poderie destinar-se entà usi civics e economics, coma ua sala d’estudi e bibliotèca e d’autes destinades entara joenessa e naui emprenedors e emprenedores. Entad açò, se prevé que institucions coma eth Conselh Generau e eth madeish Ajuntament, a trauèrs tanben de hons de tipe autonomic, estatau e europèu, poguen contribusir ara reabilitacion e remodelacion dera bastissa entà que vengue un centre culturau e economic de referéncia. Totun, aguesta ei sonque ua propòsta qu’er Ajuntament vò consultar damb es vesins e vesies.
Participa!
Er Ajuntament demane era tua participacion entà definir er usatge finau deth Centre Culturau de Bossòst. Dèisha era tua propòsta:
