Eth municipi acuelh ua hèira d’antiguitats es dies 7, 8 e 9 d’abriu
Eth municipi de Bossòst se premanís aguesti dies entà acuélher es processons e diuèrses activitats qu’auràn lòc pendent era Setmana Santa. Coma ja ei abituau, era Associacion de Setmana Santa organize es processons de Diuendres Sant (Via Crucis deth maitin e Sant Enterrament ena net) e Dimenge de Pasca (Sant Retrobament), ath delà d’acompanhar es oficis damb un grop d’armats.
Bossòst ei er unic municipi dera Val d’Aran que consèrve aguestes processons e place, ath delà, eth Monument de Setmana Santa o de Dijaus Sant en presbitèri dera glèisa romanica de Santa Maria dera Purificacion, un destacat element patrimoniau deth sègle XVII, damb scènes dera Passion, que ven de restaurar-se per miei de diuèrses fases impulsades peth Conselh Generau d’Aran.
Pendent es dies 7, 8 e 9 d’abriu, ua hèira d’antiguitats tornarà a èster presenta, per dusau an, ena Sala Polivalenta.
PROGRAMA
Dimenge de Rams, 2 d’abriu
12.30 h. Missa.
Dijaus Sant, 6 d’abriu
18.30 h. Missa, damb lauatòri de pès.
22.00 h. Ora Santa.
Diuendres Sant, 7 d’abriu
10.00 h. Processon deth Via Crucis.
19.00 h. Ofici (Missa).
22.30 h. Processon deth Sant Enterrament.
Dissabte Sant, 8 d’abriu
20.00 h. Missa solemna de Vegilha Pasquau.
Dimenge de Pasca, 9 d’abriu
12.30 h. Missa solemna.
13.30 h. Processon deth Sant Retrobament.
Lòcs:
Es oficis an lòc ena glèisa parroquiau de Santa Maria dera Purificacion, d’a on gessen tanben totes es processons.
